Në këtë kumtesë me temë nga sintaksa e gjuhës shqipe synohet të trajtohen veçoritë dhe struktura argumentore e disa foljeve të shqipes, të cilat marrin argumente të realizuara me sintagma komplementuese ose eptimore me vlerën e një fjalie, pra folje të fjalisë drejtuese që i plotësojnë valencat e tyre me fjali argumentore. Qëllimi i trajtesës është që, bazuar në korpusin e marrë në shqyrtim, të vihen në dukje karakteristikat e përbashkëta të këtyre foljeve në gjuhën shqipe, ku dallojnë nga foljet e tjera që nuk pranojnë si argumente sintagma me vlerë fjaliore dhe të shqyrtohen gjithashtu disa raste kur të njëjtat folje të këtij tipi paraqesin struktura të ndryshme argumentore. Metoda e përdorur është analiza dhe përshkrimi, ndërsa materialet e shfrytëzuara janë vjelë nga disa romane të letërsisë shqipe bashkëkohore, por edhe nga publicistika.